Davao City – Ubay ubay sumala pa nga mga lokal opisyal sa gobyerno ang mihangyo sa Commission on Election (COMELEC) og Certificate of Authority for Security Detail (CASD) sa pagbaton og security escorts taliwala sa gipatumang gun ban.
Sa pakighinabi sa DXDC RMN Davao kang Atty. Krisna Samantha Caballero, spokesperson sa COMELEC-XI, gibutyag niini nga adunay mga gobernador, bise gobernador, mayor, bise mayor ingon man mga konsehal nga mihangyo sa buhatan nga makakuha og security escorts panahon sa election period alang sa taliabot nga 2019 midterm election.
Gisaysay ni Caballero ginatugutan nila ang nahisgutan alang sa ilang seguridad subay usab sa ilang patakaran nga ginapatuman diin kinahanglan usab nga ang ilang kuhaon nga security details o body guards naggikan sa security agencies nga na-aprubahan sa COMELEC sa gunban exemption.
Gipasabot sa opisyal nga ang maong CASD kinahanglang pa usab nga aprubahan sa kaulohan aron mahatagan kini og 30-day Temporary Authority for Security Detail (TASD) alang sa ilang seguridad.
RadyoMaN Kirby Manzon
