Pagadian City – Gipasakaan na og kasong paglapas sa Sec 5 ug 11 sa RA 9165 kon ang mas nailang Comprehensive Dangerous Drug Act of 2002 ang security guard kinsa nadakpan sa buy bust operation alas 10:35 kagahapon sa buntag.
Gilusad sa tropa sa Provincial Drugs Enforcement Unit, Regional Drugs Enforcement Unit, Philippine Drugs Enforcement Agency (PDEA-Region 9) ug elemento Pagadian City PNP sa Zone 9, Phase 2, Alta Tierra Tiguma, Pagadian City ang operasyon batok sa target nga giilang si Samsodin Amis Malaco, 37 anyos, minyo, nagpa-ila nga security guard sa CMO ug residente sa Barangay Mahayag, Lulutan, Dimataling, ZDS.
Nakumpiska gikan sa dinakpan ang dagkong pakete sa gitoohang shabu nga motimbang sa 10 gramos ug mobalor sa 68 mil pesos, usa ka cellphone ug ang duha ka tag 500 pesos.
Sa interview sa RMN-Pagadian ngadto kang PCPT NEIL CLIFTON PUGOY, sa PDEU, nasayrang si Malaco ang aduna nay kanhing kaso ug napriso na apan gumikan sa plea bargaining, nahatagan kini ug kahigayonan nga makagawas gikan sa prisuhan.
Usa ka bulan nilang gipanid-an ang suspek hangtud nga kini nahulog sa kamot sa otoridad..
Kasamtangang gikustodiya na ang dinakpan sa Provincial Drug Enforcement Unit (PDEU) alang sa tukmang disposisyon.
