Davao City – Gitumong karon sa banana industry sa rehiyon nga pangitaan ug hustong solusyon ang numero unong suliran sa kahusay ug kalinaw nga padayong nasinatian sa mga nag-unang players sa saging dinhi sa habagatan.
Matud ni Philippine Exporters Confederation Inc. President Ferdinand Marañon, gitinguha nila nga masolusyonan ang kahadlok, kabalaka ug kahingawa sa mga nag-engage sa pagpananum ug pagpangbaligya ug saging abroad ilabi na sa dakung impact niini sa estabilidad ning maong industriya.
Dugang ni Marañon nga angay usab nga likayan na sa mga banana planters ug exporters ang paghatag ug ‘revolutionary tax’ ngadto sa New People’s Army (NPA) sanglit makapadugang man kini sa kalisud sa ilang tagsa-tagsa ka mga kumpaniya.
Kahinumdoman nga usa sa gi-atake sa mga rebelde mao ang Lapanday box plant sa Mandug, Macondray plastic plant sa Bunawan ug usa ka umahan sa Calinan hinungdan sa pagka-dislokar sa ubay-ubay nga mga trabahante ug binilyon ka pesos nga damyos sa propyedad.
Naglaum ang ilang sektor nga matuki sa hingpit ang ilang critical security concerns sa dihang buksan dinhi ang usa ka dakung panagtigom sa mga miyembro sa ilang industriya.
Kumpirmadong motambong atol sa naasoyng business ug trade forum mao mismo si Defense Sec. Delfin Lorenza ug uban pang mga kadagkuan sa Duterte administration.
Kasamang June Duterte
