*Omentao ya tambien el numero del aquelios quien ya muri de bala na ciudad este despues un maestro el mas reciente victima de tiro.*
*Este vez ya sosede na Talon-Talon del Martes por la noche.*
*El victima amo si Ibrahim Baguinda y Bakil, 34, casao y un Arabic Teacher de Masjid Abubakar na Talon-Talon, mientras por swerte nohay tupa bala consu 3-año hija quien aquel tiempo ancas conele na motor.*
*Asegun con el pulis el incidente ya ocuri banda alas 10 del noche cuando el man tata’y-anac muntao na XRM motorsiclo pasando na Talon-Talon Loop y cuando de llegar serca na un parmacia, tiene ya lang dos persona muntao na otro motorsiclo ya abuya y el ancas ya rega de bala con Ibrahim.*
*Cuando ya tumba sila na motor, el criminal ya atraca pa con el victima y ya continua repica de tiro con Ibrahim hasta ya muri este.*
*El bata sustene lang contusion por el tumbada pero nohay tupa bala conele.*
*Maga pulis ya recobri 24 capsula de 9mm pistola na lugar del incidente.*
