Davao City – Hugtan ug pakusgan pa ang seguridad. Kini ang panawagan karon sa muslim community ngadto sa gobyerno human sa sunod-sunod nga pagpamomba nga unang nahitabo sa Jolo Cathedral sa Sulu niadtong Dominggo, Enero 27, 2019 ug gisundan sa pagpabusikad sa usa ka moske sa Zamboanga City.
Sa pakighinabi sa DXDC RMN Davao ni Ustadz Mahmoud Adilao, regional chairman sa Ulama League of the Philippines, nanawagan kini sa kagamhanan labi na sa militar nga mandato mao ang pagpanalipod sa katawhan nga pahugtan ang seguridad aron malikayang mabiktima ang mga sibilyan nga sagad madamay sa binuhatan sa mga terorista.
Gipasabot sa opisyal nga ang pagpamatay hugot nga gidili sa pagtuong Islam diin makonsidera kining pinakadakong sala bisan sa ubang relihiyon.
Nanawagan usab kini ngadto sa mga terorista nga atubangon lamang ang ilang mga kaaway ug dili idamay ang mga sibilyan nga walay kalaban-laban.
“Wala ni gitugti sa relihiyong Islam, kining pagpamatay sa mga sibilyan kay pinakadako ni nga sala. Ang akong panawagan, ang gobyerno kinahanglang hatagan nila og importansya, i-secure nila ang katawhang Pilipino. So dapat, muhimo sila’g lakang, paskugan nila ang security.” saysay niini.
RadyoMaN Kirby Manzon
