Davao City- Hugot nga seguridad ang ipatuman sa Davao City Police Office kun DCPO sa himuong lihok-protesta dinhi sa syudad subay sa Adlaw sa Pamuo kun Labor Day karong adlawa.
Sumala ni DCPO spokesperson Police Sr. Inspector Ma. Teresita Gaspan nga andam na ang kapulisan nga i-assign karong adlawa alang sa pagbantay sa seguridad sa katawhan sa ilusad nga lihok-protesta.
Naglaum usab si Gaspan nga mahimong malinawun ang maong aktibidad ug walay kasamok nga matala.
Matud pa magsugod og martsa ang mga progresibong grupo alas 8 karong buntag dinhi sa syudad diin panawagan nila mao ang undangon na ang kontraktwalisyaon ug himuong 750 pesos ang national minimum wage.
Dugang niini, ala 1 unyang hapon sunugon sa mga grupo sa mamumuo ang effigy ni President Rodrigo Duterte sa freedom park ning dakbayan diin gitawag nila kini nga “Deathterte”.
RadyoMaN Don Pulayao/ RadyoMaN Renz Barbarona
