Davao City – Dugang personahe sa otoridad ang gikatakdang i-deploy sa taliabot nga 2019 Midterm Election aron mamahimong hapsay ug malinawon ang pinili-ay.
Sa pakighinabi sa DXDC RMN Davao kang Atty. Krisna Samantha Caballero, spokesperson sa Commission on Election (COMELEC)-XI, gibutyag niini nga kini ang usa sa ilang gitutokan atol sa panagpulong kauban ang Armed Forces of the Philippines (AFP) ug Philippine National Police (PNP).
Segun ni Caballero nga ila usab nga i-sigurong mabiyahe ang mga gamit sa eleksyon ngadto sa nagkalain-laing probinsya sa rehiyon.
“Mangayo ta og mga security sa pagtransport nato sa atong mga election paraphernalia ug uban pa didto sa atong mga provincial hubs. Pag-abot ani anytime soon, kinahanglan ni siya ma-escortan.” saysay niini
Gipasabot sa COMELEC spokesperson nga ang pagpa-ilalum sa tibuok Mindanao sa category red alang sa election tungod usab sa mga election-related incidents sa nakalabay nga pinili-ay ingon man hulga sa mga rebeldeng grupo.
Dugang pa sa opisyal, angay lang usab nga mapahugtan pa ang seguridad sa eleksyon tungod sa mipatigbabaw nga balaod militar sa isla sa Mindanao.
“If naay declaration sa Martial Law, ato pud nga pahigpiton pa gyud nato pag-ayo ang atong security labi na sa muabotay nato nga eleksyon.” segun niini.
RadyoMaN Kirby Manzon
