Davao City – Andam na ang Davao City Police Office (DCPO) sa seguridad alang sa umaabot nga Pasko Fiesta 2018 dinhi sa syudad sa Davao.
Atol sa gipahigayong AFP-PNP presscon, gibutyag ni DCPO spokesperson P/Sr, Insp. Ma. Teresita Gaspan nga body-to-body system ang ilang ipangdeploy nga mga pulis diin kini sugdan sa Nobyembre 23 hangtod Enero 2 sa mosunod nga tuig.
Gani gikanayon ni Gaspan nga sugod Disyembre dili na mamahimong maka leave ang tanang otoridad sanglit full alert kini.
Gipaniguro ni Gaspan nga bisan adunay pipila ka event nga magsabay, mabantayan gihapon nila kini inubanan sa Task Force Davao ug mga personahe nga gikan mismo sa Police Regional Office 11 (PRO-XI).
Matud sa maong tigpamaba nga magdepende ang numero sa personahe sa kadak-on sa aktibidad sama na lamang sa San Pedro area diin asa ipahigayon sagad ang mga Christmas events.
Aduna usab ipangmontar nga Incident Command System (ICS) post sa matag lugar nga gipahigayonan sa aktibidad diin anaa na ang presensiya sa mga membro sa security ingon man emergency personnel.
RadyoMaN Jason Amisola
