Davao City- Gipalig-on sa Public Safety and Security Command Center, City Transport and Traffic Management Office, City Tourism Operations Office ang seguridad sa Sta. Ana Wharf.
Atol sa Sta Ana Wharf Operations uban ang mga boat owners gipresenta ang proposed layout ug arrangement aron sa mas hapsay nga operasyon diha sa Sta Ana Wharf.
Gibutyag ni PSSCC Assistant Head Angel Sumagaysay nga silbing tubag usab sa mga nadawat nga reklamo nga kawat gikan sa mga turista’g bisita nagdugang sila’g mga pulis sa area.
Niaging semana pa gi-deploy ang dugang mga kapulisan subay sa pagpahugot sa seguridad sa lugar.
Samtang gisulti ni CTTMO Chief Dionisio Abude nga sa pier 2 ang drop-off area alang sa mga biyahero nga mutabok sa Samal aron tanan ma-inspeksyon sa mga awtoridad.
Kinahanglan usab nga ang tanang mga adunay sakyanan mu-park sa designated parking area nga nahimutang tunga sa pier 1 ug pier 2 sa wharf.
Ang maong rekomendasyon gikatakdang iimplementa karong bulana.
RadyoMan Aimee Guinita
