Seguridad sa Tuna Festival mas gipahugtan, ubang aktibidad gipangbalhin

General Santos City — Lauman ang mas hugot nga seguridad sa Tuna Festival sa dakbayan sa Gensan karong tuiga. Kini ang gibutyag ni OIC- City PNP Director Police Senior Supirentendent Romeo Berango.

Atol sa gipahigayon nga press conference sa Tuna Festival, gibutyag sa PNP ug Joint Task Force Gensan nga isip kabahin sa pagpahugot sa seguridad mao ang pagbalhin sa lokasyon sa ubang mga aktibidad sa Tuna Festival, sama na lamang sa Sugbahan sa Dalan.

Nasayran nga ang Sugbahan sa Dalan naandan nga ginahimo sa may Pioneer Avenue, apan karong tuiga ibalhin na kini atubangan sa Oval Plaza Covered Court kung asa mao ang sentro sa selebrasyon. Tumong niini nga mausa ang konsentrasyon sa kapulisan sa paghatag ug seguridad uban ang militar.


Gawas niini, pabilin usab ang pag-bawal sa mga bag pack, hait nga mga butang o hinagiban, pag-panigarilyo ug uban pa nga kanunay nga ginabawal sulod sa Oval Plaza hilabina panahon sa kagab-ihon. Positibo gihapon ang mga otoridad nga luyo sa nahitabong kasamok sa pipila ka mga lugar sa Mindanao, dugukon gihapon ug mga bisita ang tinuig nga selebrasyon sa dakbayan sa Gensan.

Facebook Comments