China – Sa takot na manakawan ng pera, isang ginang sa China ang nag-trending ngayon matapos itong lumusot sa X-ray security scanner sa istasyon ng tren sa Dongguan East Railway Station.
Nangamba ang ginang na manakaw ang perang nasa loob ng kaniyang bag na gagamitin niya sa pagsalubong ng Lunar New Year kaya’t sa takot na mawala ito sa paningin ay sinakyan din niya ang conveyor belt at dumaan sa X-ray scanner.
Ikinagulat naman ng ibang pasahero na nag-aabang ng kanilang gamit sa dulo ng conveyor belt nang lumabas sa makina ang babae.
Pinayuhan tuloy ng mga opisyal ng nasabing istasyon ng tren na huwag gayahin ang ginawa ng ginang dahil delikado sa kalusugan ang radiation na dulot ng X-ray scanners.
Nabatid na nag-viral ang video at higit tatlong milyong beses na din itong napanood.
