Davao City- Naglusad na og manhunt operation ang Buhangin PNP batok sa sekyu nga mi-shotgun sa iyang kauban hinungdan sa kamatayon.
Paspas nakasibat ang suspek nga si Rex Alquizar, hamtong, sekyu sa Regional Security Agency Forces ug nanimuyo sa Tagum City human nga iyang napatay si Jessie Magalucot,35 anyos ug taga-Parang, Maguindanao.
Sa imbestigasyon sa homicide and arson section sa Buhangin Pnp, nasuta nga lango sa binong makahubog si Magalucot dihang gikonpronta niini ang suspek samtang pareho sila nagduty sa Althea Ciudades Subd. Tigatto, Buhangin district 2:40 sa kadlawon.
Unang gikasahan sa biktima ang suspek uban sa pagpabuto tumong sa semento gamit ang isyu nga 12 gauge shotgun.
Una paman naka-angat sa shotgun si Magalucot gibawsan na kini og pusil ni Alquizar tumong sa lawas resulta sa kamatayon niini.
Human sa hitabo daling mikabayo sa iyang motor ang suspek ug dayon paturatoy og dagan palayo sa mao nga lugar.
Ang Scene of the Crime Operatives nakarekober og pipila ka basyo sa armas nga gigamit sa suspek.
Padayon pa ginasuta sa kapulisan kung aduna ba’y bangi ang duha una pa nahitabo ang krimen.
Kasamang Joel Viray
