Tukuran, Zamboanga del Sur – Gipaslak na karon sa Tukuran Municipal Police Station detention cell ang usa ka sekyu human kining nadakpan sa otoridad sa gipahigayon nga buy bust operation pinaagi sa tropa Provincial Drug Enforcement Unit , elemento sa Tukuran Police ug PDEA-Zamboanga del Sur didto sa Purok Narra, Barangay Militar, Tukuran, Zamboanga del Sur alas 6:15 kagabii.
Giila ang nadakpan nga si JIMAR MORADOS ER-ER (2016 Drug Surrenderee), 30-anyos, ulitawo ug security guard nga residente sa Purok Bidlisiw, Barangay San Carlos, Tukuran, niining probinsya.
Nakuha gikan sa posisyon sa dinakpan ang upat ka pakete sa gitoohang shabu nga dunay market value Php 5,000.
Nahipos usab gikan sa maong sekyu ang 1,000 nga buy-bust money ug usa ka cellphone color itom.
Kasong paglapas section 5 ug 11 sa RA 9165 kun Comprehensive Dangerous Drugs of 2002 ang kasong pagaatubangon sa dinakpan.
