Barangay Granada, Bacolod City – Bangud sa kapigaduhon kag nagabalati-an nga bata, napilitan nga magpangawat ang isa ka suspendido nga guwardia pasado la una kaina sang kaagahon sa Purok 5, Barangay Granada, ciudad sang Bacolod.
Nakilal-an ang suspek nga si Sandy Sevilla, 27, tumandok sang Barangay Buenavista, Escalante City kag temporaryo nga naga-istar sa Hacienda Carmen, Barangay Granada.
Ginsulod sini ang balay sang biktima nga si Nunistell Mae Fulo, isa ka artist/painter kag model kag nagapuyo man sa nasambit nga lugar.
Suno sa imbestigasyon sang Police Station 5 sa pagpamuno ni Chief Insp. Sherlock Gabana, gin-aku ni Sandy ang krimen kun sa diin ginpahayag sang suspek nga ginsulod sini ang compound sang balay sang biktima pasado la una kaina sang kaagahon kag nagpanago lang ini sa banyo nga yara sa guwa sang balay.
Pasado las sais sang aga sang nagguwa ang biktima nga si Nunistell para magsulod sa banyo kag nagkit-anay ang duha.
Bangud sa kakibot, nagsinggit ang biktima rason nga ginbuno na lamang ini sang suspek sang kapin anum ka beses.
Dasun naman nga ginbuno ni Sandy ang kabulig sang puluy-an nga si Mary Grace Muboda sang duha ka beses pero ini ang tigayon nga nakapalagyo kag nangayo sang bulig sa kaingod.
Gilayon naman nga nagpalagyo ang suspek apang sa bulig sang mga kaingod nga nakakita sa iya, madasig ini nga nadakpan sang otoridad.
Sa interview sang RMN DYHB Bacolod, ginpahayag sini nga napilitan siya nga nga magpangawat bangud wala ini sang kwarta nga inug-gasto sa walo ka bulang niya nga anak nga babaye nga una nga gindala sa opsital bangud sa LBM.
Nahibalu-an nga isa ka security guard sa isa ka dormitory sa 18th Lacson Street ang suspek apang gin-suspend ini sang tinalikdan nga bulan bangud masami ini nga late magsulod sa iya trabaho.
Story first posted by RMN DYHB Bacolod
For more news updates like our official Facebook page www.facebook.com/ifmbacolod943
