Davao City – Daku ang pagtoo ni Sasa Barangay Kagawad Ma. Celine Padpad nga ang pagpabaya sa katawhan sa obligatory minimum health safety protocol ang rason sa bag-ong surge kun spike sa virus.
Busa gikalipay si Padpad sa pagpabalik sa curfew hour ug liquor ban kay daku kini og ikatabang aron ma-kontrolar ang paggawas sa mga tawo dinhi sa dakbayan ilabi na aron kapugngan ang ‘non-essential movements.’
Dugang ni Padpad, ang gibuhat sa ilang barangay mao ang pagtahag og tahas sa ilang mga purok leaders sa pagbalay-balay og pahibalo sa ilang katawhan kalabot sa subling pag-imposar sa curfew hour regulation.
Kahinumdoman nga sagunson nga nabutang sa adunay pinakadaghang kaso sa COVID-19 sa tibuok pilipinas ang Davao City subay sa datos gikan sa Department of Health (DOH) Central.
Dugang sa kagawad nga usa ang ilang barangay nga nabutang isip ‘high risk area’ sa tibuok syudad hatud usab sa sunod-sunod nga natalang nangatakdan sa balatiang makamatay.
Malaumon si Padpad nga pinaagi sa curfew hour, madeklara ang ilang lugar nga mamahimong gawasnon sa COVID-19 ilabi na nga gipakusgan sa ilang Barangay Council ang pagpatuman sa maong mga palisiya.
“Ang rason nganong taas ang kaso sa COVID sa Davao, siguro kana tungod kay bagsak ang Davao City (sa self-regulation) tungod ang atong katawhan man gud, murag bale-wala man gud gihapon ang kagaw…Pero (kun) kita mismo (diha) sa atong kaugalingon naa ang disiplina, malabanan gyod nato ang COVID,” panapos ni Padpad.
RadyoMaN Joel Viray
