Davao City – Selos ang motibo sa pagdunggab patay sa usa ka live-in partner ngadto sa managsuon ug usa ka higala niini ganinang alas-5:45 sa buntag sa Blk.1, Sunrise Village, Matina Crossing, Davao City.
Sa report sa Talomo PNP, giila ang mga biktima nga mao sila si Jessa May Tecson Abitona, 25 anyos, Jesybell Tecson Abitona , 20 anyos ug alyas James, 17 anyos pulos taga Manay, Davao Oriental ug temporaryong nakapuyo sa nasangpit nga lugar samtang ang suspek mao si Daryl Pakna Aguilar, 22 anyos, live-in partner ni Jessa May.
Base sa mga silingan, bandang alas-12: 45 sa kadlawon kalit miabot ang suspek sa maong panimalay kinsa lango sa ilimnong makahubog ug nakadungog sila nga nag away ang maong mag live-in partner.
Nakadungog usab ang mga silingan nga nangayo og tabang ang mga biktima apan wala na lang nila kini tagda tungod nagtuo sila nga aduna lamang kini problema sa pamilya.
Bandang alas-5 sa buntag, nakadawat og impormasyon ang caretaker sa maong boarding house pinaagi sa facebook messenger gikan kang Aguilar ug miangkon nga iyang gidunggab ang iyang kapuyo ug ang uban pang kauban niini.
Dihang gisulod ang ilang lawak nakit-an si Aguilar kinsa nakaangkon usab og samad dinunggaban human gituohang misulay og hunos sa iyang kinabuhi ug ang lain pang tulo ka mga patay’ng lawas sa biktima.
Daling gidala sa balay tambalanan si Aguilar ug sa pagkakaron luwas na kini sa makakuyaw nga kahimtang samtang ang patayng lawas sa mga biktima gidala na sa Angel Funeral Parlor.
Nakit-an sa crime scene ang usa ka kitchen knife ug usa ka. 38 revolver nga walay bala.
Sa pagkakaron giandam na ang mga kaso nga ipasaka ngadto sa suspetsado.
RadyoMaN Abi Bibera
