Davao City – Pakyas ang usa ka bana sa pagpatay sa lalake nga iyang giselosan human mikagar ang dala nga pusil busa gitigbas na lamang niini ang biktima alas 9:00 sa buntag nga nahitabo sa purok 27, Barangay Inayangan, Calinan District ning syudad.
Nakahiagom og daghang samad sa kalawasan ang biktima nga si Hermie Pasculado, 41 anyos human siya gitigbas ni Ramil Nuñez nga pulos mga nanimuyo sa nasangpit nga dapit.
Nasuta nga musakay na unta sa motorsiklo ang biktima dihang kalit mibutho ang suspek ug sa walay daghang istorya gipusil si Pasculado apan mikagar og pila ka higayon ang pusil niini mao nga gitigbas na lang sa suspek ang driver gamit ang sundang.
Nasayran nga mibuto lamang ang pistola dihang gipabuto kini pataas busa nakahigayon ang igsoon sa biktima sa pag-ilong sa armas de fuego.
Migula sa imbestigasyon sa Calinan PNP nga niadtong Disyembre 29 nakita matud pa sa suspek ang iyang asawa nga mikabayo sa motor sa biktima nga maoy ugat hinungdan sa tumang selos nga gibati ni Nuñez.
Naglusad na karon og manhunt operation ang kapulisan aron sikopon ang suspek nga paspas nakasibat human sa iyang pagpanigbas kang Pasculado.
RadyoMaN Don Pulayao
