Sa interview sa DXDC RMN Davao kang Maning Duran, presidente sa Southeastern Mindanao Diversified Drivers and Operators Cooperative (SEMDDOC), iyang gisulti nga ilang girespeto ang panawagan sa PISTON kontra sa public utility vehicle modernization program (PUVMP) sa gobyerno.
Matud ni Duran kung PUV modernization ang ginakontra sa PISTON sa kaulohan, bus modernization program usab ang ginakontra sa SEMDDOC sa Davao City.
Gipasabot sa SEMDDOC official nga dili usab sila miyembro sa PISTON hinungdan nga walay laumang transport strike sa Davao Region. Lisod usab sumala pa nga masakrispisyo ang panginabuhian o kita sa mga Public Utility Jeepney (PUJ) driver tungod lang sa pagpartisipar sa tulo ka adlaw nga transport strike.
“Importante kaayo ang konsumo sa atoang driver, sa ilang pamilya. Maoy nay ilang sigurohon. Wala ‘ta kabalo asa na sila (ang PISTON) gikan og budget kay nganong mo-strike man sila,” sulti ni Duran.
RadyoMaN Kirby Manzon
