Davao City – Dali namalit og face shield ang commuters isip lakip sa mga rekisitos sa pagsakay sa mga Public Utility Vehicles (PUVs) diin apil ang mga drivers ug conductors ang gi-obliga niini apan hasol ug gasto lang matud pa kini.
Sa interbyu sa DXDC RMN Davao kang Maning Duran, Presidente sa Southeastern Mindanao Diversified Drivers & Operators Cooperative (SEMDDOC), gibutyag niini nga dugang problema kini sa publiko labi na sa galastuhon gumikan sa lisod nga sitwasyon karon tungod sa COVID-19 (Coronavirus Disease 2019) pandemic.
Segun ni Duran, sakto ra unta ang pagsuot og face mask ug pagtuman sa social distancing isip nag-unang health protocols apan isip mando, kinahanglan kining sundon sa katawhan.
“Another napud na nga hasol sa mga tao. Ang problema migasto napud ta. Wala baya ‘tay kita karong panahona. Ang pinaka importante face mask man gyud, social distancing,” segun ni Duran.
Hinuon, gipasabot sa SEMDDOC President nga bisan hasol kini apan kinahanglang sundon tungod kay kaayohan kini sa tanan ilabi na kung gikan kini sa mga health officials nga maoy mas nasayud sa gi-atubang karong sitwasyon sa COVID-19 pandemic.
RadyoMaN Kirby Manzon
