Davao City – Wala na nakurat ang Southeastern Mindanao Diversified Drivers & Operators Cooperative (SEMDDOC) human nagbaton og taas presyo sa mga produktong petrolyo diin halos tanang kumpanya nagpatuman og muabot sa P2.05 matag litro sa Diesel karong adlawa (October 6, 2021).
Sa interbyu sa DXDC RMN Davao kang Maning Duran, SEMDDOC President, gisaysay niini nga basta padulong na ang Disyembre, aduna gayoy pagtaas sa presyo sa produktong petrolyo tungod sa taas nga demand labi na sa mga nasud nga nagabugnaw na ang temperatura.
“Karon man gong panahona, hapit na December, dili na mi matingala ana kay kada man gud year-end na, mao gyud na magtaas gyud (ang presyo sa) atong krudo, gasolina,” sulti ni Duran.
Wala usab nakita ni Duran nga solusyon ang pagbaton og ‘price freeze’ sa lana tungod kay mamahimo kining hinungdan sa pagtaas sa pamasahe diin makalolooy na usab ang riding public nga maapektuhan niini.
Gidugang sa SEMDDOC president nga walay suporta ang gobyerno kanila diin nagbahad kining dili nila suportahan ang mga mukandidato sa eleksyon nga dili makatabang sa ilang sektor.
RadyoMaN Kirby Manzon
