Davao City – Gilaumang aduna nay mga Public Utility Jeepneys (PUJs) ang makabiyahe ugmang adlawa, Mayo 19, 2020 human na-obserbahan nga wala kaayoy mibiyahe nga PUJs karong adlawa diin balik-trabaho na ang ubang indibidwal ilawom sa General Community Quarantine (GCQ).
Sa interbyu sa DXDC RMN Davao kang Maning Duran, Presidente sa Southeastern Mindanao Diversified Drivers & Operators Cooperative (SEMDOCC), gibutyag nini nga wala pa naka-comply sa rekisitos ang ubang mga drivers/operators rason nga wala pa sila mibiyahe.
“Wala pa man gud tanan naka-comply sa tanang mga requirements kay una makadagan ang sakyanan kinahanglan kumpleto na. Naay mga requirements nga gipangayo nga kinahanglang i-comply ayha sila mubiyahe, kadtong special permit.” saysay ni Duran.
Samtang, wala pa usay plano nga mubiyahe ang uban tungod sa posibleng pagkalugi gumikan sa ginapatuman karong social distancing sulod sa sakyanan batok sa COVID-19.
RadyoMaN Kirby Manzon
