Davao City – Dako og ikatabang sa pagbuntog sa kriminalidad ang pagban sa
pagsuot og facemask sama sa bonnet, tinted crash helmets ug uban pa.
Mas dali mailhan ang driver sa motor kun walay tabon ang iyang nawong
samtang magmaneho ug kun magbuhat man og krimen dali ra dayon sila mailhan
sama sa riding-in-tandem.
Apan si Southeastern Mindanao Diversified Drivers Operators Cooperative
(SEMDDOC) President Maning Duran nagbutyag nga walay rason aron kopyahon sa
siyudad ang face mask ban didto sa Mandaue City.
Ang punto ni Duran mao nga dinhi sa dakbayan wala na magtabon sa nawong ang
riding-in-tandem nga nagapamatay og drug personalities ug mga kriminal
sanglit kun patyon gyod ka mahitabo gayod kana.
Kung ikumpara ang Davao City ug ang Cebu sa hisgutanan sa kahapsay ug
kalinaw, dili matago nga mas labing tunhay ang atong siyudad itandi sa mga
dapit didto.
Rampant matud pa ang kriminalidad sa Cebu apan dugay kaayo masulbad sa
kapulisan ang usa ka panghitabo ug samot na dili gilayon madakpan ang mga
kriminal sa ilang dapit.
Matud ni Duran nga dinhi sa Davao City dili malimod nga mas tunhay ang
sitwasyon sa atong dakbayan tungod kay dali ra mana dayon madakpan sa mga
otoridad ang mga kriminal busa walay rason nga sundugon sa lokal nga
kagamhanan ang Mandue City ug ang Cebu Province.
Hinoon, aminado si Duran nga mas bentaha kun way face mask ang driver sa
motor kay niana makita dayon ang nawong sa sakay apan gitindugan niini nga
wala na panginahanglanapa ang facemask ban.
RadyoMaN Joel Viray
