Davao City – Gilauman na sumala pa sa usa ka transport group ang pagtaas sa presyo sa mga produktong petrolyo labi na sa mga bulan nga gikonsiderang “ber months”.
Sa interbyu sa DXDC RMN Davao kang Southeastern Mindanao Diversified Driver Operators Cooperative (SEMDOCC) President Maning Duran, gisaysay niini nga ilaha nang gilauman ang oil price increase sa ber months ug labi na usab karon nga adunay nahitabong drone attack sa mga oil facilities sa Saudi Arabia.
“Basta ber months na gani mutaas gyud na ang presyo na sa gasolina kay ang demand sa world market taas man so mutaas pud ang presyo. Gibombahan pa gyud ang Saudi Arabia, lisod sila maka suplay sa ato, samot kamahal,” saysay ni Duran.
Gawas niini, bugnaw na usab ang klima sa gawas sa nasud sa maong mga panahon diin taas sila og demand sa diesel o gasolina tungod sa ginagamit mga heater.
Nasayran nga ang oil price hike bag-ohay lamang ang pinakadakong pagtaas nga gipatuman karong tuiga.
RadyoMaN Kirby Manzon
