Ginbweltahan ni Senator Grace Poe ang mga bloggers nga ginapatihan nagapalapta sang mga sala nga impormasyon sa social media.
Sa ginpatigayon nga hearing sang Senate committee on Public Information and Mass Media subong nga adlaw, ginsiling ni Poe nga apisar ginahatagan sila sang higayon para ipahayag ang ila opinyon, wala naman sila sang kinamatarong nga magpalapta sang fake news.
“Bloggers, although they have a right to criticize, do not have the right to misinform. Opinions passed off as news are as deadly as lies,” suno kay Poe.
Dugang pa sang senadora nga dapat unahan sang gobyerno ang pakigbato sa nasambit nga problema.
Angut sini, ginapa-subpoena man sang Senate panel ang ginapatihan yara sa likod sang ‘Silent No More’ blog nga si Cocoy Dayao.
Sa matandaan, ang nasambit nga blog ang nagtawag sa pila ka mga senador bilang ‘Malacanang dogs’ bangud sa indi nila pagpirma sa isa ka Senate resolution angud naman sa pagkundenar sa ginapatihan extra-judicial killings sa pungsod.
Lakip man sa mga ginapatambong sa madasun nga hearing ang mga representative sang social media giant nga Facebook kag search engine nga Google.
———————–
For more news updates like our official Facebook page: www.facebook.com/ifmbacolod943
