TACLOBAN CITY – Prayoridad han Coco Development Industry Law an mga parag-uma hin lubi ha bug-os nga Pilipinas.
Sanglit ginsiguro ni Sen. Cynthia Villar, Senate Chairman for Committee on Food and Agriculture nga an P105-B nga pondo han Coco Levy Fund in mahihingadto ha mga parag-uma.
Sumala kan Sen. Villar, an Philippine Coconut Authority (PCA) an mangunguna pagdestribwer hini nga pondo sanglit an mga parag-uma in kinahanglan magpalista ha mao nga ahensya.
Basi ha General Appropriation Act (GAA) 5 billion pesos an ig-gagawas nga pondo kada tuig tinikangan yana nga 2018.
Ha kamanduan, 750 million pesos o kun 15 percent han pondo in para han scholarship program han mga anak han parag-uma.
15 percent gihapon an ighahatag para ha mga Coconut Farmers Organizations, 10 percent naman ha health benefits ngan 30 percent naman para ha pagpa-upay han umahan.
Kukuhaon gihapon tikang ha pondo an 30 percent para han Shared Facility Program kun diin diri poproblemahon an mga equipments kay baton na han Coco Development Industry Law ini.
Dugang han Senadora, sisiguraduon niya nga ngatanan nga parag-uma in makakatagamtam hini nga benepisyo.
