Ginpasakaan naman liwat ni Senador Franklin Drilon sang apat ka counts sang kaso nga Cyber libel si anay Provincial Administrator Manuel Mejorada nga una na nga na-convict sa amo man nga kaso nga ginpasaka ni Drilon kag nasentensyahan na nga mapriso sang apat ka tuig kag duha ka bulan.
Gin-file ni Drilon ang panibag-o nga kaso batuk kay Mejorada kaina sa opisina ni Pasay City Prosecutor Elmer Cris Rillo.
Suno kay Drilon nga apesar napamatud-an na nga guilty si Mejorada sa nauna nga kaso nga ginpasaka niya , padayon ini sa gihapon sa pagguba sa iya pinaagi sa mga Video posts sini sa Youtube.
Una na nga nasentensyahan si Mejorada sang RTC sa Pasay City sang 2017 nga mapriso sang duha tubtub apat ka tuig apang ginpalawig sang Court of appeals sa apat ka tuig kag duha ka bulan.
Magluwas sa kaso nga ginpasaka ni Drilon, may ginapangatubang man si Mejorada nga kaso nga Cyber libel nga ginpasaka ni anay Governor Arthur Defensor Sr.
