Nakiusap si Senator Christopher “Bong” Go sa kaniyang mga taga-suporta na huwag nang ituloy ang mga tarpaulin at itigil na ang pangangampanya para sa kaniya.
Umaasa si Go na maiintidihan ng kaniyang mga supporter ang paulit-ulit niyang inihahayag na pag-atras sa pagtakbo sa pagkapresidente sa 2022 elections.
Hiniling din ni Go na pamasko na sa kaniya na huwag nang matipon-tipon pa sa Commission on Elections (COMELEC) para abangan siya sa paghahain ng withdrawal ng kandidatura.
Ayon kay Go, sinabi naman ng COMELEC na hanggang May 9 ay pwedeng formally mag-withdraw sa eleksyon.
Giit ni Go, huwag na siyang pagdudahan dahil nagpapakatotoo siya sa tunay niyang saloobin at nagre-resist din talaga ang kaniyang puso at isipan sa pagtakbo sa pagkapangulo.
Idiniin ni Go na ang kaniyang desisyon ay sakripisyo alang-alang sa pagkakaisa ng bayan, para sa kapakanan ni Pangulong Duterte na ayaw niyang maipit at masaktan at para sa kaniyang pamilya na tutol sa kaniyang pagtakbo sa pagkapangulo.
