Muling uupo bilang Senate President ng 20th Congress si Senator Chiz Escudero.
Ito’y matapos makuha ni Escudero ang supermajority ng boto ng mga senador laban sa katunggali nitong si Senator Tito Sotto III sa botong 19-5.
Si Senator Joel Villanueva ang tumayo para i-nominate si Escudero bilang senate president na siyang sinegundahan naman nina Senators Sherwin Gatchalian, Bato dela Rosa, at Raffy Tulfo.
Habang si Senator Sotto ay ini-nominate naman ni Senator Migz Zubiri at sinegundahan ni Senator Loren Legarda.
Dahil natalo sa pagka-Senate President, tatayong Minority leader si Sotto na bubuuhin kasama ang mga miyembro ng oposisyon na sina Senators Legarda, Zubiri, Risa Hontiveros, at Panfilo Lacson.
Samantala, mananatili ring Senate President pro-tempore si Senator Jinggoy Estrada habang Senate Majority Leader at Chairman ng Committee on Rules si Senator Joel Villanueva.
Wala namang kalaban sa pwesto sina Estrada at Villanueva.
Mananatili ring Senate Secretary si Atty. Renato Bantug Jr. habang itinalaga naman bilang bagong Senate Sergeant-at-Arms si retired Police Major General Mao Aplasca na nagsilbi ring Sergeant-at-Arms sa Kamara noong panahon ni dating House Speaker Lord Alan Jay Velasco.
