Davao City – Ubos sa atong pamalaud, ang tanang Pilipino gihatagan og katungod ug kagahum nga makadagan sa posisyon nga gusto nila sa panahon sa eleksyon sa nasud.
Ang balaod nagsulti nga ang puwede lamang makaapil sa piniliay kadtong natawo sa Pilipinas, nag-edad og 21 anyos, botante, unom ka buwan nakapuyo, makabasa ug makamao mosulat.
Segun ni Davao city First District Election Officer Atty.Krishna Samantha Caballero, wala na mag-require og college degree sa eleksyon basta naangkon lamang ang mga rekwisitos nga giingon sa balaud, mamahimo nang katugtan makalansad ang usaka lungsuranon.
Matud ni Caballero, dili puwedeng baliran sa COMELEC ang usa ka aspiring candidate nga magduso sa iyang Certificate of Candidacy (CoC) alang sa piniliay.
Nahimong init nga hisgutanan sa nasud ang pagsulod diha sa Magic 12 sa senatorial race nila ni Lito Lapid ug ni Bong Revilla Jr gumikan sa lebel sa ilang edukasyon ingon man ang pagbudots sa nakalabay nga kampanya.
Si Manuel Mercado kun mas nailing Lito Lapid sa daghang mga pelikula niini, natawo sa bulan sa Oktubre 25, 1955 sa Porac, Pampanga.
Si Lito Lapid migradwar sa Porac Central School tuig 1968 ug 1972 sa Saint Catherine Academy alang sa sekondarya apan wala na makatungha sa kolehiyo tungod kay nahimo na kining artista.
Nagsugod sa pulitika si Lapid tuig 1992 dihang mikandidato kini sa pagkabise-gobernador sa Pampanga ug hangtud pagka-gobernador tuig 1995 ug 1998.
2004 midagan sa pagka-senador si Lito Lapid ug midaog human nakasulod sa Rank 11 sa senatorial race.
Si Jose Maria Mortel Bautista, Jr kun mas nailing Ramon Bong Revilla, Jr sa iyang mga pelikula nakahuman sa elementarya sa Cavite ug sa high school sa Los Angeles, California, USA tuig 1982.
Bisan og wala makatungha sa kolehiyo si Bong Revilla apan usa siya sa mga senador nga nakaduso ug nagpanday og daghang mga balaudnon diin ang uban nahimong hingpit nga balaud sa nasud.
Pipila sa mga balaud nga gipasar ni Revilla nga nakatabang sa katawhan mao ang Road Safety, Health and Poverty Alleviation, Mandatory Helmet Act, Expanded Senior Citizens Act ug uban pa.
Dili man makatugbang sa edukasyon sila Revilla ug Lapid sa ilang mga kaubanang senador ni makadebate sa plenaryo sa Senado, ang ilang napanday nga mga balaud nagpakita sa ilang pagka-productive senator sa Pilipinas.
Sa istorya sa politika sa Pilipinas, daghan sa mga pulitiko walay igong edukasyon sama ni Joseph ‘Erap’ Estrada nga usaka college dropout sa Central Colleges of the Philippines apan miapil sa 1998 presidential election ug midaug.
Gipasabot ni Caballero nga gikinahanglan nilang ipatuman ug sundon ang balaud sa walay pagpihig as long as makamao mubasa ug musolat, dili puwedeng punggan makasalmot sa piniliay.
Gawas lang kung amyendahan ug usbon ang balaud sa bugnong lugaynon sa nasud, segun ni Caballero.
Gipalanog pa sa tigpamaba sa COMELEC-XI nga dili na obligasyon sa ilang buhatan ang pagtudlo kung unsaon paghimo og balaud sanglit wala sila’y ingon niini nga programa alang sa mga nahimong bag-ong senador.
Ang bugtong mandato ug tahas lamang sa COMELEC mao ang pagpahigayon og eleksyon sa matag tulo ug unom ka tuig ug gawas niana wala na’y lain pa, panapos pa ni Caballero.
RadyoMaN Joel Viray
