Gipanigurado sa Provincial Disaster Risk Reduction and Management Office (PDRRMO) Davao Occidental nga nagapadayon ang ilang pagpanubay sa damyos nga gibilin sa 6.8 magnitude nga linog ingon man aron masuta usab kung aduna pa ba’y laing mga indibidwal ang naangol o nakabsan sa kinabuhi.
Kini human nga wala na natabang pa ug gideklarang patay na ang usa ka 79 anyos nga lalaki human nga naigo sa nangatagak nga bato atol sa linog niadtong Byernes, November 17, 2023 sa Barangay Butuan, Jose Abad Santos, Davao Occidental.
Sa pakighinabi sa DXDC RMN Davao sa Jose Abad Santos Municipal Police Station (MPS), giila ang biktima nga si Antonio Tabogoy.
Sa pagpanubay sa otoridad, nasayran nga naghigda lang ang biktima sa duyan atol sa pagtay-og samtang nangatagak ang bato ug naigo kini hinungdan sa iyang hinanaling kamatayon.
Butyag usab sa usa ka Mary Joy Esparis nga wala sila nagdahum nga sa maong paagi mamatay ang ilang lolo ug dako matud pa ang kadaot ug kahadlok nga dala sa nahitabong linog.
RadyoMaN Ivy Parido
Facebook Comments
