Si Carmen Tupag, ( naka green) usa sa mga biktima sa aksidente sa Initao, Misamis Oriental
Patay ang 69 anyos nga senior citizen, tungod sa impact sa pagkabangga sa iyang gisakyang Nissan jeep sa usa ka Rural bus, pasado alas-3: sa hapon, niadtong nakalabay’ng adlaw, Miyerkoles, Enero 9, sa National Highway sa Barangay San Pedro, Initao, Misamis Oriental.
Naila ang biktima nga si Andresa Sabado, taga-Initao, gideklarang dead-on-the spot sa Misamis Oriental Provincial Hospital sa nasangpit nga lungsod.
Sa imbestigasyon sa kapulisan, nasayran nga paingon sa sementeryo ang biktima aron motambong sa lubong sa iyang paryente dihang napalong ang makina sa gisakyang Nissan jeep sa may tungason nga bahin paingon sa sementeryo.
Tungod kay dili na maka-break ug nawad-an og kontrol ang usa usab ka senior citizen nga driver nga si Juanito Waslo, paspas nga miatras ang sakyanan paingon pagkabangga sa Rural Transit bus.
Nakaangkon og mga samad ug bun-og sa kalawasan ang driver ug upat ka mga kaubang pasahero nga nailang sila si Carmen Tupag, 56 anyos; Panfilo Tacbobo, 57; Filomena Uy, 52; ug Magdalena Bagares, pulos mga residente sa Initao.
Matud pa ni Senior Inspector Arlyne Ranario, hepe sa Initao Municipal Police Station, ang driver sa bus nga si Ramil Malinao, taga-Ubaldo Laya, Iligan City, daling mitahan sa iyang kaugalingon ngadto sa kapulisan bisan paman sa pamahayag sa mga biktima nga wala kini sala tungod kay aksidente ang nahitabo.
Kagahapon, nagkita-kita ang mga nalambigit nga mga indibiduwal aron magsabot-sabot alang sa usa ka settlement.
