Patay ang isa ka senior citizen, matapos nga bungguan sang tricycle sa Brgy. Pagalungan, Polomolok, South Cotabato, alas 9:00 kahapon sang aga, Agosto 16, 2021. Sa imbestigasyon sang Polomolok MPS, isa ka Yamaha STX 125 tricycle, color black, ginamaneho ni Ruel Dimasiado Ortigas , 45 y/o, may duha ka pasahero ang nakabunggo sa biktima nga si Blas Bendita, 64 y/o kag residente sang Prk. Nasidlangan Citizen Village, Brgy. Poblacion, Polomolok, South Cotabato. Suno pa nagabyahe ang tricycle halin sa Brgy. Simbo, Tupi padulong sa Brgy. Poblacion, Polomolok kag pag-abot sa nasambit nga lugar nabungguan sini ang biktima nga nagatabok sa dalan. Gindala pa sa ospital ang biktima, apang gindeklarar nga dead on arrival sang attending physician tungod sa naangkon nga seryoso nga head kag body injuries. Boluntaryo naman nga nagsurender sa Polomolok MPS ang driver sang tricycle.
