Davao City – Patay ang usa ka Senior Citizen human naapil sa pagkasunog alas-10:02 sa buntag nahitabo sa Toyota Street Brgy. Centro Agdao, siyudad sa Davao.
Sa esklusibong interview sa DXDC RMN Davao kang SFO3 Ramil Gillado, imbestigador sa Bureau of Fire Protection (BFP), ang biktima naila nga si Adela Abad 61 anyos nagpuyo sa nahisgutang lugar.
Matud ni Gillado nga usa ka balay ang totally damage kinsa gipanag-iyahan ni Antonio Bioco ug duha ka balay ang partially damage.
Saysay niini nga nagsugod ang sunog gikan sa bodega sa panimalay ni Bioco ug paspas nga mikanit ang kalayo hinungdan nga wala na kagawas ang biktima sa ikaduhang andana.
Nigawas sa imbestigasyon nga loose connection ang hinungdan sa sunog ug gibana-banaan nga mukantidad og P200,000 ang damyos sa sunog diin alas-11:05 gideklara nga fire-out.
Subling nagpahimangno si Gillado sa tanan katawhan nga ipa-check ang mga gipanggamit nga linya sa kuryente kun duna bay damage or di ba nag over loading, ug panahon usab nga magluto gikinahanglan nga bantayan aron malikayan ang sunog.
RadyoMaN Don Pulayao
