Davao City – Gikatakdang mahatag na ang pension sa mga indigent senior citizens o ang cash assistance sa Social Pension Program subay sa pamahayag sa Department of Social Welfare and Development (DSWD).
Sa pakighinabi sa DXDC RMN Davao kang Bjorn Sondon, Project Development Officer 1 sa DSWD-XI, gibutyag niini nga gikatakdang sa sunod semana mahatag ang alang sa Davao del Norte. Sa bulan sa Hulyo usab ang sa Davao de Oro, Davao del Sur ug Davao Oriental. Samtang sa bulan sa Agosto mahatag ang alang sa mga benepisyaryo sa Davao City.
Gipasabot ni Sondon nga dili dungan nga mahatag ang maong cash assistance sa tanang mga benepisyaryo sa rehiyon tungod sa gihimong validation o ang paglimpyo sa mga listahan alang sa kadto lamang kwalipikado.
Nasayran nga P6,000 ang budget nga madawat sa mga benepisyaryo sa tibuok tuig o P3,000 gikan sa Enero hangtud sa Hunyo ug dugang P3,000 kantidad ang mahatag ayha mahuman ang tuig.
Nangayo usab og pagsabot ang opisyal ngadto sa mga benepisyaro ug gipasalig nga mahatag ra gayud ang ilang budget sa dili madugay.
“Maging patient ta. Our office exerts efforts para ma-facilitate, ma paspas ni. Mangayo lang mi’g despensa sa mga kadtong naga follow-up tapos wala pay payout. So kadtong reklamo nila, among office, willing mi mutubag, mag answer sa mga queries nila,” tataw ni Sondon.
Nasayran na gi-densenyo ang maong Social Pension Program alang sa mga ‘indigent older persons’ subay sa Expanded Senior Citizens Act of 2010 or Republic Act 9994.
RadyoMaN Kirby Manzon
