Senior small window hours gisuportahan

24

Davao City – Dakung uyon ang Office of Senior Citizens Affairs (OSCA) dinhi sa Davao City sa hangyo sa mga katigulangan nga tugtang makagawas sa ilang mga panimalay gikan sa alas-9:00 sa buntag ngadto sa alas-11:00 sa sayong kaudtohon aron makapamalit sila sa ilang mga basic needs and necessities.

Matud ni OSCA Davao Head Pastor Luis Moran, mas labaw nang adunay basihan ang paggawas ug pag–adto sa mga malls sa mga senior citizens tungod sa DILG Memorandum Circular No.2020-110 pirmado ni Sec. Eduardo Ano niadtong August 16, 2020.

Subay sa memorandum, gidirektahan ang tanang mga LGUs nga tugtan nang makagawas ug makaadto sa mga establisimiento-komersyal ang mga tigulang basta ang ilang mahinungdanon lang nga panginahanglanon sama sa pagkaon, tambal ug serbisyo nga gikinahanglan sama sa check-up ug medikasyon sa ospital ug uban pa ang ilang tuyo.

Segun ni Moran, daghan sa mga seniors ang nagpadangat og mulo sa iyang buhatan may kalambigitan sa padayon nga paghikaw sa ilang kagawasan nga makasulod sa bugnaw’ng mga dapit kon gambalay sama mga malls karon nga gilurangan na ang quarantine classifications sa pipila ka mga lokalidad.

Dili lilong kang Moran ang dayag nga kamatooran nga luya ug dili na kusgan ang immune system sa mga tigulang ug dili na makabugno ang ilang panglawas sa COVID-19, busa mabutang lamang sa tumang kakuyaw ang ilang kinabuhi kun tugtang makagawas-gawas.

Dugang ni Moran nga kadto lamang mga tigulang nga himsog pa ang panglawas ug manarbaho ang tugotang makagawas sa ilang mga pinuy-an apan kadtong mga seniors nga walay mahinungdanong tuyo, mas maayong magpondo na lamang usa sa tagsa-tagsa nila ka mga panimalay.

Pahimangno sa OSCA Davao Head ngadto sa mga seniors nga dili kalimtan ang hingpit nga pagtuman sa pertinenteng health protocols pinaagi sa pagsul-ob og face mask, face shield ug social distancing aron dili sila matakdan sa virus panahon nga anaa sila sa mga pampublikong lugar sama sa mall, palengke, groceries ug uban pang areas of public convergence.




“Uyon kaayo ang opisina (OSCA Davao nga makagawas ug makaadto sa malls ang mga seniors) but there must be precautionary measures as well…So, under man ‘ta sa MGCQ, puwede man sila mugawas (in order to obtain) essential goods ug services ug kadtong muadto sa trabaho…Pero kung magsuroy-suroy lamang, dili pod puwede,” matud ni Moran.

RadyoMaN Joel Viray

Facebook Comments