Davao City – Dakung uyon karon ang Senior Citizens Organization Tibungco Chapter sa katuyoan sa gobyerno kun nganong gilakip sa quarantine control measures ang pagdili sa mga batan-on edad 20 anyos paubos ug kadtong mga senior citizens nga gawasnong makagawas-gawas sa ilang panimalay.
Matud ni Senior Citizen Chapter President Josie Puntilar, dayag nga nahimong dakung konsiderasyon ni Pres. Rodrigo Duterte mao ang panglawas ug kaluwasan sa mga katigulangan gikan sa risgo nga dala sa pandemic busa gidid-an sila nga makasuroy-suroy diha sa mga pampublikong lugar.
Dugang ni Puntilar, wala siya’y nakitang dautan sa mando sa gobyernong nasyunal nga dili sila pagawson sa ilang mga balay samtang anaa pa ang pandemic threat.
Segun ni Puntilar, wala siya batia og kalaay ug kapuol pagpondo sa balay tungod kay ang iyang gika-busyhan sulod sa pila ka bulan nga quarantine period mao man ang pagluto og kakanin aron ibaligya sa ilang dapit sa may Tibungco.
Kung tugtan ang mga katigulangan nga makagawas ug makaadto sa mga dapit nga gusto nilang lulinghayawan, sigurohon ra gyud mga kadtong himsog lamang ang panglawas maoy tugtan samtang ang mga huyang og immune system ug kadtong prone or vulnerable sa COVID-19 angay magpondo lamang usa sa balay.
Hinoon, nagpahimangno si Puntilar sa iyang mga ka-edad nga magsuot pirmi og face mask ug face shield, magbitbit kanunay og hand sanitizer ug motuman sa social or physical distancing aron mabatukan ang mangilngig ug makamatay nga kagaw nga miigo karon sa tibuok kalibutan.
RadyoMaN Joel Viray
