Davao City – Subay sa nakalap nga mga datos sa Sentro ng Nagkakaisa Coalition Labor Group, nisaka na sa kapin 9M ka Pilipino ang nawad-an og trabaho ubos sa Duterte administration.
Nunot kini sa pagkatanggal sa trabaho sa mga trabahante ilawom sa contractual system sama sa gatusan ka mamumuo nga gitaktak sa usa ka kumpanya sa semento sa nasud.
Matud ni Sentro Davao Coordinator Mike Ybañez, ang pagkatangtang sa mga contractual workers resulta kini sa wala pagtuman sa saad ni Pres. Rodrigo Duterte nga humanon ang Endo sa nasud.
Samtang mitungtong sa minilyon ang walay trabaho, midungan usab ang pagsaka sa presyo sa basic ug prime commodities apan ang gobyerno inutil gihapon sa pagpitol sa mga negosyante nga mapahimuslanon sa panahon, butyag ni Ybañez.
Tataw kaayo nga dili malipayon ang kinabuhi sa mga Pilipino karon gani mas nagkulismaot pa hinoon ikumpara sa nanglabay nga mga panahon, panapos ni Ybañez.
RadyoMaN Joel Viray
