ILIGAN CITY- Nangunay na sa pagbisita sa mga hinterland barangays ang Iligan Light and Power Incorporated o ILPI.
Tinguha nila nga mahatagan ug sugang dagitab ang katawhan sa hinterland barangays nga hangtud karon nag-antus sa kangitngit sa kagabhi-on gumikan sa kawad-on sa supply sa kuryente.
Matud ni ILPI Spokesperson Engr. Kenan Erigbuagas nga sila na ang kasaka karon sa kabukiran sa pagpahigayon ug orientation o seminar alang niadtung buot magpakutay ug kuryente.
Sa maong kalihukan usab nila ipasabot kun unsa ilang hikayon nga mga rekisitos ug proseso nga ilang buhaton aron mabutangan sila ug supply sa kuryente.
Tuyo sa ILPI nga masugaan ang katawhan sa tibuok barangay hinungdan nga padayon ang ilang mga lakang karon aron kini hingpit nga mahatag ngadto kanila.
Natuman na ang dugay nang katuigan nga gipangandoy sa mga lumolopyo sa barangay mainit nga makaangkon ug sugang dagitab.
Matud sa pipila ka mga residente sa maong barangay nga taud-taud na gayud sila nag-antus sa kangitngit sa ilang lugar gumikan sa kawad-on sa linya sa kuryente.
Hinungdan nga daku kaayo ilang pasalamat ngadto sa ILPI tungod gihatagan na ug katumanan ang ilang mga pag-ampo nga makaabot na sa ilang barangay ang linya sa kuryente.
Mismong ang ILPI ang migahin ug budget alang sa maong proyekto nga electrification program sa mga hinterland barangays dinhi sa dakbayan sa iligan.
