Kay ang uban diha makita sulod sa eskwelahan dala ang kaalam nga ginatanom sa utok sa kabatan-onan.
Karong tuiga, dungan tang saulogon ang adlaw sa atong mga magtutudlo kinsa wala’y puas nga nagapaambit sa ilang kinabuhi ug panahon aron mahulma ang mga estudyante diha sa pagkab-ot sa mga tinguha sa kinabuhi ug aron sila matultolan sa tamang dalan.
Usa lang si Teacher Jeric Mabilao sa daghang magtutudlo sa Pilipinas, kinsa nag-viral sa social media tungod sa iyang tim-os nga gugma sa iyang mga bata pinaagi sa paghatag og pagkaon ug vitamins kanila matag adlaw, epektibo ug makalingaw nga pagtudlo pinaagi sa pagkanta o pagsayaw ug ang pagpang-apud-apod niya’g bugas ngadto sa mga ginikanan.
Matud ni Teacher Jeric sa interview kaniya ni Chito Samontina, una niyang pangandoy mao ang mahimong usa ka reporter o news anchor nga madungog sa radyo o makita sa TV apan tungod sa kapobrehon, gidala siya sa kapalaran ngadto sa kinabuhi sa mga estudyante, isip maestro ug didto siya nakaamgo nga gihimo siyang tulay sa Ginoo aron ang pipila ka kinabuhi sa mga tawong nagkinahanglan mabag-o.
Ang World Teacher’s Day 2023 subay sa temang ‘Together for Teachers’, saulogon sa mga tulunghaan ilabi na sa rehiyon onse pinaagi sa mga programa ug paghatag og mga pahalipay ug kalingawan kanila karong October 5 ug 6 isip balos sa ilang wala’y puas nga sakripisyo ug pagtudlo sa kanato.
RadyoMan Ivy Parido
