Jamindan, Capiz- Ginlunsyar sang local government unit(LGU) sang Jamindan ang Serbisyong MAKatao Program sang nakaligad nga Marso 5, 2020 sa Barangay Agbun-od sa nasambitan nga banwa.
Ini ang ginpasakopan sang mga municipal officials sa pagpanguna ni Mayor Mac Artur Valdemar, tanan nga frontline offices, Jamindan Municipal Police Station, BFP-Jamindan Fire Station, DILG Office, NCIP subong man nga pomuluyo kag mga mga barangay officials sang amo nga barangay.
Ang amu nga programa nga gin-organisar sang lokal nga pangulohan sang Jamindan ang nagatuyo nga madul-ong ang pila ka mga serbisyo kag programa para sa mga pomuluyo ilabi na ang mga yara sa malayo nga lugar ukon ang mga ginatawag nga Geographically Isolated and Displaced Area (GIDA) areas.
Samtang antes sini, ginpatigayon man ang blessing kag ribbon cutting sang bag-o na-construct nga alagyan nga ginpundohan sa municipal government.
Ang Barangay Agbun-od amo ang labing una nga barangay nga benepisaryo sang “Serbisyong Makatao Program” kun sa diin kalakip sa mga gintan-ay nga mga serbisyo amo ang free dental, medical, circumcision, medicine, livebirth registration (free on pupils), massage, manicure, pedicure, haircut, free legal aid, vegetable seeds dispersal, dog immunization, tricycle franchising kag clearances.
Nagpatigayon naman sang information drive ang pila ka mga ahensya sang gobyerno may kaangtanan sa ila mga programa kag serbisyo ilabi na sa mga senior citizens.
“Ang pagdala it Programa it Lokal nga Pang-gobierno it Jamindan para sa mga Kabarangayan isa ka pamatuod nga ang aton pagpanerbisyo MAKATAO kay ginadul-ong ta sa mga mas naga kinahanglan kag ini padayunon ta para kita mangin Shining Jamindan” Hon. Mayor Mac Artur L. Valdemar.
