Cuantos hora ya lang antede implementa el Comelec gunban na entero paiz, aqui na ciudad de Zamboanga bien preparao el maga pulis y militar para implementa maga leies bajo na Omnibus Election Code.
Bajo na lei, el pulis y maga soldao ay pone maga pijo y random checkpoint na maga calsada para hasegura nohay quine carga pusil y maga cosas que puede usa para mata gente.
Todol maga legitimo ta dueña pusil inlugido maga pulis y militar y otro maga agencia de govierno gendeh mas basta-basta carga pusil sin el permiso del Comelec.
Ta hace acorda el election officer del Comelec el abogao Stephen Roy Cañete con el publico que bajo na lei tiene que obedese con el maga proviciones del gunban especialmente na maga checkpoint.
Pero ya aclara otravez si Cañete gendeh tamen basta-basta puede manda abre maga compartment del maga vejiculo sin el mandato del corte.
Alas 12 del meja noche na Enero 12 ay comensa ya el Perio de Eleccion donde na mismo tiempo ay pone ya tambien maga checkpoint na maga calsada.
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
