Davao City – Kapin duha na ka bulan nakalabay sukad nakaplagan ang putol-putol nga parte sa lawas sa mga babaye nga biktima sa chop-chop apan hangtud karon nagpabilin gihapon wala masulbad ang mangilngig nga mga kaso.
Sa interbyu sa DXDC RMN Davao News Team kang DCPO Spokesperson Police Senior Inspector Maria Teresita Gaspan nagbutyag nga nagpabilin pang wala masulbad ang serye nga chop-chop incidents sa syudad sa Dabaw.
Gisulti ni Gaspan nga padayon pa ang ilang pangalap og mga impormasyon labot sa mga suspek nga walay kaluoy mipatay ug miputol-putol sa kalawasan sa mga biktima ug gilabay sa pipila ka dapit sa dakbayan.
Naglisod sab og istablisar ang mga imbestigador sa pinaka motibo sa serye nga chop-chop incidents ug kinsa ug taga-asa ang mga biktima sanglit hantud karon wala pa’y nag-claim sa mga patay’ng lawas.
Base sa talaan, unang gibulabog sa chop-chop incidents ang usa ka Barangay sa Samal human naglutaw-lutaw ang mga parte sa lawas nga iya sa babaye ug lalake buwan sa Hulyo.
Duha ka semana nakalabay human sa Samal, laing chop-chop nga lawas sa babaye nga gisulod og itom nga cellophane ang nakit-an sa usa ka CENRO garbage collector sa basurahan sa Cabantian Road Buhangin pasado 5:00 sa buntag Hulyo 30.
Pila lang ka semana nakalabay, lain na usab nga putol-putol nga parte sa lawas sa usa ka babaye ang gisulod og cellophane ug gilabay sa New Carmen Tugbok ning syudad kung asa ang mga biktima pareho giputlan og finger ring.
Ang makapanglibawot balahibo nga serye nga chop-chop incidents padayon nagpabilin nga misteryoso kung kinsa ang naghimo niining tanan.
Tungod ani, nagpahimangno ang otoridad sa tanan hilabi na sa mga kababaenhan nga magmaigmaton ug magbinantayon sa tanang panahon aron dili madagit ug mabiktima niini nga brutal nga pagpatay.
Gipagawas ang mao nga tambag human adunay mikatag nga taho sa social media nga adunay pipila ka menor-de-edad nga mga babaye gisuwayan og dagit sa wala mailhing mga kalalakin-an sa usa ka mall apan maayo na lang kay nakadagan sila.
Si Gaspan nag-ingon nga ila pang sutaon ang nasangpit nga impormasyon diin nagdumili una ang opisyal sa pagkumpirmar sa naasoy nga taho.
RadyoMaN Joel Viray
