Serye sa tulis sa Davao del Norte, gikaalarma na sa mga residente

Davao City- Nanawagan karon ang katawhan sa Davao del Norte sa mga kapulisan nga iprayoridad ang seguridad sa publiko human ang natahong sagunson nga tulis partikular na sa Tagum City gikan niadtong Setyembre hangtod niining kasamtangang bulan.

Kahinumdoman nga niadto lang October 2, tugpa sa balay tambalan ang usa ka Mark Kenneth Aton human nga gi-holdup ug gipusil sa duha ka wala pa mailhing suspect sa Brgy. Mankilam, Tagum City ug niadtong niaging gabii lang October 4, aduna’y mga armadong lalaki ang nanulis sa Purok Gumamela sa naasoy nga syudad.

Sumala pa sa usa ka Magie Gofredo nga niadtong Oktobre 4 usab sa gabii, gitiunan matud pa og pusil sa wala mailhing mga lalaki ang iyang anak ug nadagit pa ang cellphone niini sa Purok 6 Buclad, Asuncion, Davao del Norte.

Hinuon, gibutyag ni Police Lieutenant Colonel Jeffrey Latayada, Officer-In-Charge sa Tagum City Police Station nga padayon ang imbestigasyon sa ilang buhatan aron sa hingpit masikop ang mga tulisan ug gilayong mas pahugtan pa nila ang pagpatrolya ug pagbantay sa seguridad sa katawhan.

RadyoMaN Ivy Parido