Davao City – Nagpabilin pa gihapong walay tagtungod ang lalaking gipusil-patay sa Juna Subdivision, Davao City, kagahapon sa kadlawon.
Gikumpirma sa tagdumala sa Angel Funeral Parlor nga nagpabilin pa sa morgue ang patay nga lawas sa biktima tungod kay wala pay tagtungod nga nipatim-aw sa punerarya.
Kahinumduman nga nakaplagan ang patay nga lawas sa biktima nga nagbuy-od nga adunay samad pinusilan sa Ricardo St., Juna Subdivision alas 3:00 sa kadlawon.
Gibutyag sa mga residente sa maong dapit nga tulo ka sunod-sunod nga mga buto sa pusil ang ilang nabati dungan ang pagpabulhot sa puting Crosswind palayo sa crime scene.
Gikumpirma usab ni Police Chief Inspector Ronald Lao, Hepe sa Talomo PNP, nga ang biktima nakuhaan og CCTV nga nagapanaka og mga balay sa mga adunahang pamilya nga nanimuyo sa Juna Subdivision.
RadyoMaN Erin Lumosbog
