Sa pakighinabi sa DXDC RMN Davao kang Police Lieutenant Colonel Jeffrey Latayada, Officer-In-Charge sa Tagum City Police Station (PS), iyang giila ang driver sa motor nga adunay sidecar nga si Jose Dago, 62 anyos ug sakay niini ang sila Elmer Dago 18 anyos, Angelie Dago 21 anyos, Melanie Dago 55 anyos, ug James Marty Llagas 17 anyos, pulos taga Dujali, Davao del Norte.
Sa imbestigasyon, gikan sa Libuganon road ang sidecar ug padulong sa national highway sa dihang sila nabangga sa walang bahin sa atubangan sa pick-up nga gimaneho ni Brigido Padilla Jr., 73 anyos, minyo, residente sa Lanang Davao City. Tungod niini, nabangga na usab ang sidecar sa laing pick-up vehicle nga gimaneho ni Milissa Tabanao 49 anyos, taga Panabo Cty.
“Kadtong motor, nitabok siya. Nahagip sa Navara nga pick-up padulong og Davao nga direksyon. Tapos nalabay sya didto salane aning white Nissan Navara nga padulong og Tagum. Nahagip napud iyang lubot sa (sakyanan) mao tong natuyok sila,” saysay sa pulis.
Kasamtangan karong gikustodiya sa Tagum City PS ang duha ka driver sa mga involved nga mga sakyanan ug gipaabot na lamang ang mamahimong desisyon sa kampo sa mga biktima.
RadyoMaN Kirby Manzon
