Sidewalk vendor sa downtown Bacolod, gintoro patay

101

BACOLOD CITY  –  Nasapwan na gid lamang nga patay na kag may igo sang tiro sa iya ulo ang isa ka sidewalk vendor kaina sang aga sa downtown area diri sa ciudad sang Bacolod.

 

Ginkilala ang biktima nga si Rolando Tison, 56 anyos ang edad, pumuluyo sang Brgy. Handumanan kag may tatlo ka mga kabataan.

 

Base sa pagpangusisa sang Police Station 1, ang biktima, upod sang pila ka mga kabataan ang nagatulog sa sidewalk malapit sa iya pwesto nga nahamtang sa atubang sang Bacolod City public plaza.

 

Suno sa isa sa mga bata, nakibot na lamang sila sang nakabati sang tatlo ka asud-asod nga lupok kag may nagtupa pa nga isa ka empty shell sang .45 calibre nga armas sa iya tiil.

 

Ginpahayag sang bata nga nakita pa niya ang isa ka lalaki nga naka helmet nga amo ang nagtiro sa biktima kag gilayon nga nagpalagyo sakay sang motorsiklo nga nagahulat sa iya.

 

Padayon karon ang imbestigasyon nga ginapatigayon sang police kon bala ano ang motibo sang krimen kag kon sin-o ang mga suspek. /dyHB BACOLOD





Facebook Comments