El OIC del National Telecommunication commission o NTC aqui na ciudad de Zamboanga Elre Galo ya anuncia aqui na RMN Zamboanga cay alas principia alas 12:00 del medio dia hasta luego alas 6:00 del noche Octubre 11, 2017 ay man shut dowm el signal del maga telecommunication company como el Globe, Tm, Smart, Talk and text y el Sun cellular.
Este parte na implementasion del seguridad enconecsion na conducta del actividad del Zamboanga Hermosa festival relatao na fiesta del La virgen del Pilar.
Asegun con Galo, ya ase ya sila sale memorandum para conel maga telecommunication company aqui na ciudad sobre el pedido del govierno local y el otoridad para man shut down el signal. Ya habla pa si Galo, mismo el companiya el embia advisory na maga subscribers aber para sale informao pero ay llama asegun sila atencion del Globe Telecom despues este nuay embia advisory na diila subcribers anoche cuando ya man shut down el signal.
Aqui na ciudad de Zamboanga cadabes chene grande ocasion ta pidi el otoridad man shut down con el signal del maga cellphone para hende toma ventaha el maga mal elementos. El maga mal elementos ta usa con el cellphone si ta plania sila crea estruendo como bomba.
Anoche alas 6:00 del noche hasta alas 9:00 del noche ya man shut down el signal del Globe y Smart. Este dia visperas del fiesta ay man shutdown tamen con el signal principia alas 12:00 del medio dia hasta alas 6:00 del noche y maniana fiesta ay man shut down tamen principia alas 2;00 del tarde hasta alas 5:00 del tarde.
Este dia amo el main program del Zamboanga Hermosa festival donde ay conduci el street dance sale na Mayor jaldon street para na Paseo del mar. El secretarya del Turismo Wanda Teo amo el guest speaker.
Mientrastanto el otoridad ta ase acorda con el maga motorista para man pasencia y busca otro ruta para evita trafico porcaosa temporariamente ay sera con cuantos maga calye donde pasa el parada. Hermie Ventura
