Siguridad sa BSKE 2023 pahugtan sa EASTMINCOM

Davao City – Nagpagula na karon og direktiba ang Eastern Mindanao Command (EASTMINCOM) sa mga ground commanders sa pagplastada daan og security plan nga gamiton sa Barangay ug Sangguniang Kabataang Election sa Oktubre 30, 2023.

Sa Press release ni EASTMINCOM Spokesperson Army Coronel Rose Manuel, gimandoan ni Eastmincom Commander Army Lt.General Greg Almirol, ang iyang mga ground commanders sa tulo ka Division sa paghitsas daan sa security measures isip preparasyon alang sa bugnong lugaynon sa Barangay ug SK nga matigayon sa katapusang semana karong bulana.

Gipasabot ni Manuel sa suwat pamahayag, ang sayo nga mando ni Lt.General Almirol sa mga ground commanders, aron mapakusgan na sa karon ang seguridad batok sa hulga gikan sa dautang mga elemento sama sa Teroristang CPP NPA NDF, samtang nagkaduol ang adlaw sa paghukom sa mga botante alang sa tanang magpapili alang sa malinawong pagboto.

Ang area sa 10th Infantry Division Philippine Army partikular na ang rehiyon onse, walay namonitor ang kasundalohan nga mga armado sama sa teroristang CPP NPA NDF nga posibleng musabwag og kagubot ning panahon sa kampanya.

Alayon ini ang Davao region, nagsaulog sa unang anibersaryo sa pagka-gawasnon na gikan sa presensiya sa mga teroristang kumonista.

RadyoMaN Joel Viray