Davao City – Giuyunan sa hut-ong sa mga technician ang sugyot nga SIM Card Registration Bill nga ginaduso sa hawanan sa kongreso.
Pabor si Alfie Obsid kinsa usa ka technician sa usa ka shop nga hingpit mabalaud sa nasud sa Pilipinas ang SIM card registration.
Segun ni Alfie, mas maayo marehistro ang atong SIM card kay mas dali unya madakpan ug masakpan ang mga ‘scammers’ nga gapangilad pinaagi sa text.
Ugaling makalusot sa kongreso ug mahimong balaud ang SIM card registration, andam si Alfie sa pagtugyan sa iyang personal nga impormasyon ngadto sa tindahan nga iyang mapalitan og SIM card.
Alang kaniya, ang pagtugyan sa kaugalingon nga impormasyon ug pagsalig niini ngadto sa tindahan nga iyang palitan og SIM card nagpakita lang nga wala siya’y gitaguan ug dili siya dautan nga tawo.
Dugang niini, ang mahadlok lamang sa SIM card registration kadto lamang mga kriminal ug mga dautan sanglit masakpan man unya ang ilang binuang ug modus operandi kung mabulgar ang ilang pagkatawo.
Nagtoo si Japhet Sape, usa usab ka technician sa usa ka shop nga dili magamit sa mga dautang tawo sama sa mga ‘scammers’ ang iyang personal nga datos ug lakip na ang iyang SIM card bisan pa og marehistro kini.
Kampante si Japhet nga dili mayatakan ang iyang privacy ugaling iparehistro ang iyang SIM card ug samtang wala kini batia og kabalaka nga basin mabutang sa kadelikado ang iyang kaugalingon diin nagtoo kini nga luwas siya sa bisan unsang hulga ug kakuyaw sa kinabuhi.
RadyoMaN Joel Viray
