Sumala ni NTC-XI Director Nelson Cañete, hangtud sa Abril na lamang makapa-rehistro sa SIM card ang mga subscribers ug human niana ang wala ma-rehistro awtomatiko kining ma-deactivate ug dili na magamit pa.
Segun ni Cañete, dunay kinatibuk-ang kapin 150 milyones ang subscribers sa mga telecommunication companies apan anaa pa lang sa 40 milyones ka sim card ang narehistro sa entero nasod diin ang pinakadaghan niini mao ang mga subscribers sa Smart, Globe, Dito ug uban pa.
Gibatbat pa sa Director, hapit na usab sila mahuman og penetrate sa hilit-hilit nga lugar sa rehiyon onse sama sa Davao Del Sur, Davao De Oro, Davao Oriental, Davao Del Norte, ug Davao City.
Dili makahatag og detalyi kung pila na ka porsento sa rehiyon ang na-rehistro sanglit ang direkta sa kaulohan ang sistema sa rehistrasyon.
Busa gihangyo sa opisyal ang mga millenials nga tabangan ang mga edaran sa pagpa-rehistro sa ilang mga sim card.
Gidasig usab niini ang kadtong wala pa nga dili na magpaabot sa ulahing mga semana sa Abril ug karon palang daan magparehistro na aron dili maghuot sa portal system nianang panahona, sanglit moabot lang sa lima ka minuto ang proseso sa rehistrasyon.
RadyoMaN Joel Viray
